طبعا كلنا شفنا حفل الملياردير الأمريكي اللي من أصل هندي أنكور جين على عارضة الأزياء الشهيرة أريكا هاموند في منطقة الاهرامات والضجة الكبيرة اللي حصلت حولين الحفل والناس اللي حضرت.. يا تري حكاية الموضوع ده وهل ممكن اي حد يعمل فرحه في منطقة اثرية مهمة زي الاهرامات أو المعابد.. وهل الدولة سايبة الاثار لكل من هب ودب علشان يعمل فرحة وهناك.. والتكلفة بتاع الليلة دي بتوصل لكام
مواقع التواصل الإجتماعي مليانة بصور وفيديوهات لحفل الجواز الاسطوري اللي كان في منطقة الاهرامات بالجيزة للملياردير الأمريكي من أصل هندي أنكور جين على عارضة الأزياء الشهيرة أريكا هاموند، وفي اسئلة كتيرة اكيد انت واحد من قالوها او جبت في بالهم ازاي الدولة بتسمح بحاجة زي كده تحصل في المناطق الاثرية وكل الدولة سايبة الدنيا كلها لاي حد عايز يعمل فرحه هناك بالسهولة دي .. واكيد بتقول برضوا في سرك امال احنا لما بندخل اي مكان في بلدنا بنتهبد ليه تذاكر وتفتيش واجراءات وليلة طويلة .
قبل ما دغامك تاخذك لبعيد وتملي دماغك اسئلة مش موجودة، الدولة حاليا فتحت باب الاستثمار للقطاع الخاص علشان يدخل يعمل مشروعات ترفيهية وتطوير للخدمات السياحية في المواقع الاثرية واللي حصل في الاهرامات والمتحف المصري بالتحرير والمتحف المصري الكبير وقلعة صلاح الدين الايوبي وقصر البارون وغيرهم كتير من المواقع الاثرية اللي الدولة طرحتهم قدام الاستثمار السياحي للقطاع الخاص لتطوير الخدمات السياحية للزائرين.
العريس الهندي حضرتك دفع 3 مليون دولار عشان يعمل فرحه قدام ابو الهول و200 ألف دولار عشان يتصور تحت تمثال الملك رمسيس الثاني وده غير ملايين الدولارات من الدعاية المجانية حولين العالم واللي كل المليارديرات في العالم دلوقتي والمشاهير والأثرياء هيفكروا يعملوا أفراحهم في المناطق الأثرية المصرية الأهم في العالم وده غير رسالة الأمن والأمان في مصر للعالم كله.
طيب اية اللي هتعمله شركات القطاع الخاص في المواقع دي واية الاستفادة اللي هترجع علي الدولة من الشركات دي؟.
بس يا سيدي.. الدولة حاليا بتحاول تعظم الدخل الدولاري من المواقع الاثرية، خصوصا ان الاثار كانت معروفة عندنا من الآلاف السنين انها موجودة علي قد حق التذكرة بس، انما حاليا الدولة بتفكر في المواقع الاثرية بشكل مختلف، بمعني انها فتحت المواقع دي لاي شركة عايزة تدخل تنفذ مشروعا ترفيهية وسياحية للزائرين وبتعمل مناقصة بين الشركات الي مقدمة وبتاخذ افضل عرض واعلي قيمة مادية للدولة .
أول مكان الدولة طرحت للاستثمار السياحي قدام القطاع الخاص كانت هيا منطقة الاهرمات واللي الدولة طرحتها قدام الشركات وفازت بيها شركة اوراسكوم القابضة بعقد هيوصل لـ15 سنة من بداية افتتاح مشروع تطوير هضبة الهرم اللي الشركة قامت بيه بالاتفاق مع اجهزة الدولة واللي هيكون يوم الافتتاح مع افتتاح المتحف المصري الكبير، ومشروع تطوير هضبة الهرم بيقوم علي تطوير الخدمات السياحية زي توفير حمامات للزائرين واتوبيسات تنقل بين الاهرامات والخدمات ومناطق الزيارة الموجودة هناك ، ده غير توفير مطاعم وباسعار مختلفة للناس اللي عايزة تاكل او تشرب، وتوفير ماكينات صراف الي ده غير تنظيم الحفلات الخاصة لاي حد بما لا يخالف الشروط اللي حطها المجلس الاعلي للآثار واهمها الحفاظ علي المنطقة الأثرية وان يكون الحفل بعيد تماما عن الاثر
من هنا بقي شركة اروسكوم وهيا وكل الشركات بتبدأ تلقي طلبات تنظيم العروض الحفلات الخاصة في المواقع الاثرية يعني بعد كده مستشغربش لو شوفت فرح او عيد ميلاد او اي حاجة في منطقة اثرية، خصوصا ان الحفلات دي بتدخل ارقام كويسة جدا للدولة وفي ناس بيحبوا يعملوا حفلاتهم الخاصة او حفلات الزواج في مكان اثري ما وتكون خلفية الصور مكان اثري مهم زي الاهرامات او غيرها من المعالم الاثرية الكتيرة اللي موجودة في مصر ومش موجودة في اي مكان تاني .
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
