رفعت «سعاد» دعوى نفقة على زوجها في محكمة الأسرة بعد تحملها المعاملة السيئة من الزوج وأهله لسنين وتحملت تدخلهم في حياتها، و بسبب ما شهدته في حياتها توجهت لمحكمة الأسرة لتعطي أولادها حياة افضل بعد الألم الذي عاشوه بسبب والدهم الذي لم يسأل عليهم حتى بالمكالمة.
قصص محكمة الأسرة.. اتجوزت في بيت عيله
قالت «سعاد» في بداية حديثها: «أنا متجوزة بقالي 11 سنة، معايا من جوزي ولدين وبنت، هو كان ابن صاحب أبويا ولما اتقدم لي كان كويس وأهله ناس كويسة، واتفاجئت إني هتجوز في بيت عيلة، بس وافقت وقلت أهله ناس محترمة واحنا عارفينهم مفيش مشكلة، لكن كنت غلطانة».
دعاوي محكمة الأسرة..شغلني عشان يلاقي حد يسد بداله
أكملت الزوجة حديثها وقالت: «قبل الجواز أنا كنت بشتغل وجوزي خلاني مسيبش الشغل حتى بعد الخلفة كنت فاكرة إنه بيعمل كدة عشاني لكنه كان بيعمل كده عشان يلاقي حد يكفي مصاريف البيت بداله، مكنش بيصرف عليا جنية لو عوزت حاجة أنا اللي بيجيبها لنفسي زي ما كنت مش متجوزة بالظبط».
حكايات محكمة الأسرة..أهله بيدخلوا بيتي في اي وقت
تابعت «سعاد» حديثها قائلة: «مشاكل المصاريف كانت بتتحل وتعدي عادي لكن مشكلتي الكبيرة كانت أهله، البيت اللي كنا فيه كان قاعد فيه أخواته وأمه وأبوه وأعمامه، كنت في بيت عيلة ومكنش فيه حياة خاصة بينا كنت ببقى نايمة في بيتي والاقي حد داخل عليا أوضة نومي وياخدوا حاجة من دولابي من غير استأذن ولو اتكلمت يتقال عليا إني بعاملهم وحش اي مشكلة تحصل بيني وبينه كله يتدخل فيها ».
قضايا محكمة الأسرة.. عايزني اتنازل عن حقي
أنهت «سعاد» حديثها قائلة: «لحد ما تعبت منهم وسيبت لجوزي البيت مسألش فيا من ساعتها ولا على الولاد حتى بالتليفون، حاولنا الصلح بشرط اننا نخرج من بيت اهله رفض وطلبت الطلاق قالي تتنازلي عن كل حقوقك والدهب في القايمة ساعتها اطلقك،رحت المحكمة عشان اعرف اخد حقي بقضايا نفقة عملي انذار بالطاعة عشان ابقى ناشز ومعرفش اخد حقي ولا حق ولادي».
تابع أحدث الأخبار عبر
