قرار رئاسي عاجل.. السيسي يصدر تعليمات صارمة جديدة
ايه التعليمات المهمة اللي أصدرها الرئيس السيسي للحكومة وخاصة وزارة التموين.. وايه علاقات التوجيهات دي بالمواطن ولقمة العيش وايه اللي طلبه الرئيس .. تعالوا نشوف إيه اللي بيحصل
الرئيس السيسي زي ما احنا عارفين مفيش شاردة وال واردة غير لما كان بيتابعها وخاصة في الأزمات الاقتصادية وبيكون عنده تصور شامل لأي مشكلة وبيتابعها اول بأول ولو فاكرين الرئيس السيسي الوحيد بين المسئولين في مصر قدام الشعب اللي كان واثق إن ازمة الدولار هتتحل وهو اللي بشر المصريين وقالهم هتعدي ومصر هترجع تجري تاني وإن الدولار هيبقي ذكري ومحدش فهم ساعتها الرئيس بيتكلم بثقة ليه وده عشان كان كلام السيسي في ذروة الأزمة واتعاش السوق السودا وقتها وفعلا حصل وانهار الدولار وانتهت السوق الموازية زي ما احنا شفنا كده.
ولما خلصت أزمة الدولار الرئيس كان متابع اللي بيحصل بعدها وخاصة ملف الاسعار والاسواق والتضخم والاحتكار وكانت تعليماته فورية إن المواطن لازم يشعر بالأمن الغذائي وبانخفاض الأسعار لدرجة هدد التجار على الهوااء وقال للدكتور مدبولي لو الاسعار فضلت بالشكل ده يبقي الدولة هتتصرف في 3 مليار دولار وتشتري سلع وتبيعها للناس مباشرة وبعدها بدأت الحكومة والتجار في تنفيذ مبادرة تحفيض الأسعار.
المهم من كام ساعة مساعد أول وزير التموين المصري، إبراهيم عشماوي، كشف إن فيه توجيهات رئاسية بزيادة احتياطي السلع الاستراتيجية وده كان أحد قرارات الرئيس من فترة إن مفيش سلعة تختفي من الأسواق وفعلا ده محصلش حتي في عز الأزمة..
المهم بردو مسئول التموين قال كمان إن رغيف الخبز بيمثل أهمية قصوى عند الرئييس وإن فيه 72 مليون مواطن مصري بيحصلو على رغيف الخبز يوميًا، وعشان كده فيه تعليمات رئاسية بزيادة السعة التخزينية للأقماح أو الأمن الغذائي القومي.
مساعد أول وزير التموين، قال كمان في في مداخلة هاتفية إن الدولة بتستهدف زيادة السعة التخزينية للصوامع والهناجر بنسبة 20%، وإن الدولة بتخطط لإنشاء صوامع حقلية قريبة من الأراضي والفلاح، يتم إنشاؤها بالتنسيق مع القطاع الخاص ودي تفكير بيحصل لأول مرة بعد تكليفات الرئيس.
ومش كده وبس .. ده الحكومة دلوقتي بتتعاون مع شركات أجنبية خاصة لتوطين صناعة الصوامع الحقلية في مصر ودي بردو بتوجيهات رئاسية مباشرة لتوطين الصناعة في مصر وأن البنك المركزي بيساهم في توفير التمويل اللازم من العملة الأجنبية، وفيه مخطط شامل من الدولة لزيادة إنتاجية الذرة الصفراء والصويا، ومش كده وبس كمان فيه توجيهات للبنك المركزي بتوفير كل التمويلات اللازمة لتوفير السلع والنتيجة انخفاض أسعارالدقيق مثلا من 22 ألف جنيه للطن إلى 16 ألفا، مع انخفاض سعر طن الأرز بنسبة 20%، وتوفير سلعة السكر في الأسواق بالسعر المحدد من الدولة.