اللي كنا خايفين منه حصل النهاردة.. شوف الكهرباء هتقطع كام ساعة عندك

علي مدار 30 يوم هما مده شهر رمضان، الناس كانوا مرتاحين من قطع الكهرباء والشوارع والبيوت كانت منورة، ومش بتقطع، لكن من النهاردة الدنيا هتختلف تماما، والكهرباء هترجع تقطع تاني عليا خصوصا اننا داخلين علي شهر الصيف.. يا تري ايه اللي بيحصل ومدة قطع الكهرباء هتكون كام ساعة.. وهتبدا من امتي وتنتهي امتي.

النهاردة وزارة الكهرباء والطاقة المتجددة بدأت تشتغل بجداول تخفيف الاحمال علي الشبكة القومية للكهرباء مرة تانية بعد اكثر من 30 يوم هما مدة شهر رمضان، ده غير اجازة عيد الفطر واللي بدات من يوم الثلاثاء اللي فات ولحد امبارح الأثنين، وهتبدأ الكهرباء من اول النهاردة ترجع تقطع من تاني زي زمان.
طيب الكهرباء هتقطع من الساعة كام للساعة كام؟.
وزارة الكهرباء والطاقة المتجددة قالت انها جت لها تعليمات من مركز التحكم القومي بقطع الكهرباء من الساعة 11 صباحا وحتي الساعة 5 المغرب وبحد اقصي ساعتين لكل منطقة وبالتتابع بين المناطق، يعني هتكون عندك الكهرباء شغالة وهتكون قاطعة في مكان تاني.
وزارة الكهرباء قالت كمان ان تنظيم جداول تخفيف الأحمال مش من اختصاصها ، وكل محافظة هيا المسئولة عن وضع جداول تخفيف الأحمال، بس ميتعداش عن الساعة 5 المغرب، وان المدة لو زادت عن ساعتين هتكون بسبب عطل فني او اي حاجة ثانية خارج جدول تخفيف الأحمال .
الكهرباء كملت كلامها وقالت أن وزارة البترول كانت مسئولة في الفترة اللي فاتت عن توفير الاحتياجات اللازمة لتشغيل محطات إنتاج الكهرباء من المازوت والغاز، واللي كانت بتختلف من يوم للثاني على حسب الاستهلاك، وكانت بتتراوح بين 11 و13 ألف طن مازوت ومن 92 إلى 96 مليون متر مكعب غاز.
طيب ليه في اماكن الكهرباء مش بتقطع فيها وبتكون قاطعة في أماكن تانية واية السبب في كده؟.
الدولة في وضع خطة تخفيف الاحمال استثنت محافظات شمال وجنوب سيناء ومطروح والبحر الاحمر والساحل الشمالي والعملين الجديدة، ده غير الاماكن الاستراتيجية وأقسام الشرطة والمستشفيات والمناطق الحيوية والوزارات المختلفة وغيرها من المناطق الواقعة علي محولات تغذية في المناطق السكنية، علشان كده هتلاقي بيوت الكهرباء مش بتقطع فيها وده لسبب بسيط جدا وهيا ان البيوت دي موجودة علي محولات عليها مناطق حيوية او استراتيجية زي اقسام الشرطة والمنشأت اللي لسه قايلن عليها لحضراتكم.
الوزارة اتكلمت كمان عني أسباب استمرار خطة تخفيف الأحمال خصوصا ان الخطة دي مكملة معانا من الصيف اللي فات ولسه مكلمة معانا لاجل غير مسمي، وهيا نقص الوقود اللي الدولة بتقدمه لمحطات توليد الكهرباء، وده ادي لانخفاض الطاقة المولدة لكفاية احتياجات المواطنين، ده غير زيادة الاستهلاك اليومي للمواطنين من الكهرباء، وعدم اتباع أساليب الترشيد اللي أقرتها الوزارة في استهلاك الكهرباء، واخيرا ارتفاع معدلات سرقة التيار الكهربائي في المحافظات والاحياء المختلفة وده خلي في فرق كبير بين الطاقة المنتجة والطاقة المستهلكة .