أمر يحدث لأول مرة من 2013.. إيه اللى بيحصل في سوق أدوات الدين الحكومية؟
يا ترى ايه اللى بيحصل فى سوق أدوات الدين الحكومية فى اخر سنة ؟ وايه الحاجة الجديدة اللى بتحصل لأول مرة من 2013 ؟ وايه حجم الاحتياجات التمويلية اللى مصر محتاجها السنة دي والسنين الجاية؟
من بداية 2024 ولحد يوم 24 ابريل أصدرت مصر أدوات دين بقيمة تعادل 71.6 مليار دولار بارتفاع قدره 57% على أساس سنوي، وفقاً لحسابات وكالة بلومبرج استنادا إلى بيانات رسمية صدرت طول الربع الأول السنة دي
وبلغت قيمة مبيعات أدوات الدين المصدرة بالجنيه المصري حوالى 69.2 مليار دولار، بزيادة 64% مقارنة بنفس الفترة من 2023 ودي النسبة الأعلى من 2013 .. وتم حساب قيمة مبيعات أدوات الدين المصرية بالدولار وفق سعر صرف العملة الأمريكية في يوم الإصدار.
طب هي مصر اصلا محتاجة تمويلات بكام؟
قدّرت مصر الاحتياجات التمويلية خلال العام المالي الجاري بـ 2.14 تريليون جنيه،وبتسعى لتوفير 1.955 تريليون منها عبر التمويل المحلي من خلال إصدار سندات وأذون خزانة.. و حسب قانون الموازنة العامة بيبدأ العام المالي فى مصر في أول يوليو حتى نهاية يونيو من العام التالي
ورفعت الحكومة احتياجاتها التمويلية في الميزانية الجديدة للسنة المالية 2024-2025، اللي هتبدأ بعد 69 يوم بنسبة 33% إلى 2.849 تريليون جنيه، وفق البيان المالي لمشروع الموازنة.. وزادت توقعها للعجز الكلي إلى الناتج المحلي الإجمالي في ميزانية السنة المالية المقبلة إلى 7.7% من 7.1% متوقعة في السنة المالية الحالية، ورفعت كمان توقعها لنمو اقتصادها إلى 4.2% من 2.9% متوقعة بنهاية يونيو المقبل.
ومن فترة قريبة خرج وزير المالية محمد معيط ونفى أخبار بتفيد ان مصر بتحاول تأجيل موعد استحقاق بعض ديونها المحلية،وقال ان مصر عندها مستهدف لزيادة عمر الدين وأكد انه مع انتهاء السنة المالية اللى فاتت كان متوسط عمر الدين عند 3.2 سنة، والتوقعات الحالية انه هيستقر عند 3.3 سنة مع نهاية السنة المالية الجارية وقال ان الحكومة بتستهدف وصول متوسط عمر الدين إلى ما بين 4.5 و5 سنين وده بييتطلب ان آجال إصدارات الديون تكون أطول.
وزير المالية شدد على أن مصر ملتزمة بتسديد ديونها في المواعيد المحددة وقال انه حتى في ظل الظروف الصعبة التزمنا بالسداد وسددنا جميع التزاماتنا في مواعيدها