عاااش البورسعيدية.. هزموا تجار الأسمال بحملة مقاطعة والأسعار نزلت الأرض

إيه اللي حصل في حلقة السمك والاسواق في بورسعيد في الساعات اللي فاتت وإزاي قدروا يهزموا جشع التجار ويفرضوا كلمتهم ويضربوا الأسعار ويرجعو سوق السمك لطبيعته.. شوف الفيديو عشان تعرف لما الناس اتحركت بأضعف الإيمان اللي حصل وإزاي تقدر كمواطن تفرض كلمتك على التجار اللي معندهمش ضمير

في الحرب العالمية التانية استغل تجار اللحوم في إحدى القرى الحرب ورفعوا الاسعار لاضعاف تمنها ولأن كل رجالة القرية تقريبا كانوا بيحاربوا مع جيشهم الستات قرروا يعلموا تجار اللحمة درس العمر وهي إنهم اتفقوا مفيش اي واحدة هتشتري لحمة والنتيجة الجزارين في القرية رخصوا الأسعار لأسعار ماقبل الحرب وبقوا يلفوا على البيوت يعتذرو ويعرضوا علىهم اللحمة بالأسعار اللي عاوزينها ونجحت حملة المقاطعة..
معروف إن المقاطعة هي سلاح من اختراع الشعوب للتجار اللي بيستغلوا اي وضع في البلد ويرفعوا الأسعار بشكل مبالغ فيه، وفي مصر الشعب المصري لجأ لسلاح المقاطعة أكتر من مرة على مر التاريخ ولأكتر من سلعة، وجابت نتائج كويسة، وأخر الحملات دي طلعت من بورسعيد واللي الناس قرررت تقاطع تجار الاسماك الجشعين واللي رفعوا السعر من 40 جنيه لأكتر من 100 جنيه من غير مبرر ولا بيعانوا من أزمة الدولار ومعندهمش حجة والنتيجة كانت مبهرة الأسعار نزلت الأرض ورجعت لأقل من 40 جنيه كمان ونجح الناس في إنهم يعلموا التجار درس العمر زي ما حصل مع تجار اللحمة في انجلترا من عشرات السنين.

والبورسعيدية كل اللي عملوه إنهم واجهوا الغلاء والاحتكار بالمقاطعة وقالوا للتجار مش هنشتري وخلي السمك يعفن وطبعا دا بالنسبة لتجار السمك والصيادين خراب بيوت مستعجل لكن زي ما انت كتاجر عاوز تستغل المواطن أبشع استغلال هو من حقه كزبون إنه يدافع عن نفسه وعن فلوسه اللي حضرتك كتاجر محترك بتسرقها منه عيني عينك لما تحتكر السمك وترفع سعره براحتك.
وفي ظرف ساعات كانت أسواق السمك خاوية على عروشها بعد ما انتشرت دعوات المقاطعة زي النار في الهشيم من خلال مواقع التواصل الاجتماعي وغصب عنهم التجار نزلو الاسعار في كل أنواع السمك ووصل بعضها لأقل من 40 جنيه بعدما وصل 100 جنيه، ووصل سعر البوري 60 جنيها بدل من 120 جنيه بانخفاض النص دفعة واحدة ومن أول يوم للمقاطعة ووصلت نسبة التخفيض بعدها الى 75 في المية .
أهالي بورسعيد أطلقوا حملة مقاطعة تحت عنوان “قاطع خليك إيجابي وخليها تعفن”، وبالفعل كان الأهالي على قدر المسؤولية وسابوا  سلع التجار الجشعين “تعفن”؛ ودا خلاهم يطلعو السمك المتخزن في التلاجات ويعرضوه في الأسواق وبأسعار منخفضة للغاية بعد أن وصلت إلى حد يفوق الخيال.

وعلى فكرة حملة البورسعيدية  بدأت من يوم السبت اللي فات، ولاقت قبول كبيرً من المواطنين من كل المدن والمناطق والقرى والناس ماصدقت تيجي فرصة عشان تنتقم من التجار معدومي الضمير، ومش كده وبس ده كمان الأهالي ورغم نجاح الحملة في تخفيض الاسعار لكن قررو يكملوا في المقاطعة  لمدة أسبوع كمان وقالوا إن أسواق بورسعيد هلت من الزباين ومحدش راح يشتري سمك  بعد تجاوز سعر كيلو السمك 250 جنيهًا وسعر كيلو الجمبري وصل إلى 1000 جنيه، وسعر كيلو الفسيخ وصل 500 جنيه. وبعدا قال رئيس شعبة الأسماك في بورسعيد، إن أسعار الأسماك انخفضت حوالي 75 في المية خلال 48 ساعة في بورسعيد؛ بسبب حملة المقاطعة.
اللي حصل في بورسعيد كان نتيجة ثقافة عالية من المستهلكين اللي أخدوا موقف ايجابي ومقعدوش يشكو على الفيسبوك ويهاجموا الحكومة ويدعو على تجار الأزمات لأن الحكومة مش هتعمل كل حاجة واثبت إن المواطن هو رقم واحد في المعادلة الاقتصادية وإن اللي حصل في سوق السمك في بورسعيد ممكن يتكررفي باقي الاسواق وفي كل المناطق ودي طريقة مضمونة ومجربة لمواجهة احتكار السلع ورفع الاسعار بدون مبرر.. الفرق إنك تكون إيجابي.